6. februar 2025
Sámij álmmukbiejvve Hábmerin 2025
Program på norsk finner du på egen side.
Divtasvuona ASVO
Mánnodagá guovvamáno 3.biejve
Kl. 19:00 Gådemiehket. Ájluovta Husflidsjuogos gåhttjo gådemiehkedij. Válde fáron ietjat bargov ja tjuovo.
Dijstagá guovvamáno 4.biejve
Kl. 10:00–14:00 Árbbedábálasj ålggobiejvve unnemusájda. Ájggop låvdagoaden dållit / dahkap dållåsajev ålggon ja ásadip sjuohpansajev. Låvdagoaden gávna sákkelájbev/dållågáhkov ja liegga juhkusav. Ålggon la máhttelis tjuorggat. Gåhttjop mánájgárdijt/skåvlåjt midjij tuvrav dagátjit. Jus ietjá juohkusa sihti boahtet, de diededa.
Gasskavahko guovvamáno 5.biejve
Kl. 09:00–14:00 Gasskavahko duodje. Válde fáron ietjat bargov jali oaste álggoábnnasav mijájs – workshop. Fállap káfav, tiejav, tjátjev ja juojddáv mij njálmev dævddá.
Duorastagá guovvamáno 6.biejve
Kl. 10:00–14:00 Snjissjkom Ájluovta Husflidsjuohkusijn, gut vuoset snjissjkomdájddagav, ja ihkap arvusmahtti duvva tjuovvot.
Árran - julevsáme guovdásj
- Kl. 09:00: Girjálasjvuoda vuosádus boadáldagán Sámedikke girjjevuorká aktijvuodan.
- Kl. 10:00: Slávggágiessem lávllagijn, káffa ja gáhko maŋŋela sinna.
- Kl. 15:30: Biebbmoguossodibme
- Kl. 16:00: Rahpám kultuvrraskåvlå duodjevuosádusás.
- Kl. 16:30: Buorástahttemhålla, direkteras Filip Mikkelsen.
- Kl. 16:35: Hábmera Jiena ja Hamarøy Vokalensemble - Sámij álmmuklávlla.
- Kl. 16:40: Buorástahttem - Hábmera suohkanis, suohkanoajvve Britt Kristoffersen Løksa.
- Kl. 16:45: Biejve hålla - Enny Waara.
- Kl. 17:00: Hábmera kultuvrraskåvllå.
Ájluovta ja Ájlátte girkko
Kl. 17:30: Gijtto Sáme tjáppa guovlos - gijttemjubmeldievnno. Hábmera Jiena ja Hamarøy Vokalensemble aktisattjat oassálassti. Ietjá oassevállde: organissta Tor Arne Grønbech, guojmmevájaldiddje Andrine Øvervoll Eivik ja præssta Rolf Steffensen.
Hábmera girjjevuorkká
Vuosádus goappátjagá girjjeåssudagájn.
Ájluovta skåvllå
Árbbedábálasj ávvudallam ja máles.
Strávnjunje åhpadahka
Slávggágiessem, dåjma ja máles.
Mánájgárde suohkanin
Árbbedábálasj ávvudallam biebmojn, musihkajn ja dåjmaj.
Knut Hamsun joarkkaskåvllå
Slávggágiessem ja biejve hålla Badjesijda skåvlån, bidos ja gáhko bårråmbåttån.
Hamarøy vekst
Ávvudalli biejvev barggijda ja oasstijda, ij la makkirak ásadibme.
Skåvlå ja mánájgárde suohkanin ásadi ávvudallamijt ja dåjmajt ma gulluji álmmukbæjvváj ålles vahkov.
Sist oppdatert