Válde julevsámegielav adnuj guovtijn ådå giellaehpajn
Sidá gus oahppat duv vuostasj bágojt julevsámegiellaj, jali hárjjidallat ságastallamijt varresvuoda ja huvso suorgen? Giellavahkko aktijvuodan gålgådismáno 19.–25.b almoduvvap guokta ådå giellaehpa. Dánna máhtá gulldalit, hárjjidallat ja oahppat ietjat ájge milta.
Buorástahttem, muhtem ådå bágo jali álkkes ságastallam máhttá liehket álggo. Dá guokta ådå ehpa vaddi ienep ulmutjijda máhttelisvuodav oahpásmuvvat julevsámegiellaj ja gielav adnuj válldet árggabiejven.
Julevsámegiella ådåálggijda
Álggokurssa hiehpá dunji gut sidá gielajn álgget. Gávtse tiemá baktu oahpásmuvá duola dagu buorástahttemij, lågojda ja bájnojda, biebmojda, dåbdojda ja bájkkenamájda.
Máhtá gæhttjat ja gulldalit duola degu bágojt ja gárgadisájt gærddot ja dahkamusájt gæhttjalit. Vállji tiemáv massta sidá ienebuv diehtet, ja máhtsa vas gå sidá ienebuv hárjjidallat.
Gæhttjal «Julevsámegiella ådåálggijda» https://lulesamisk-nybegynnerkurs.up.railway.app/ External link.
Julevsámegiela varresvuodaparlerra
Dát æhppa l sierraláhkáj varresvuoda ja sujto suorge barggijda. Dan sinna li lågenanakta oahppamoase bágoj ja ságastallamij barggoárggabiejve dilijs.
Máhtá ságastallamijt gulldalit, replihkajt hárjjidallat ja dahkamusájt tjoavddet. Ehpan la aj diehtogálldo gånnå máhtá dárogiellaj ja julevsámegiellaj åhtsåt. Sisanon li vuodon ságastallamgirjásj ja medisijnalasj báhkogirjje, ma li Varresvuoda tærmmaprosjevtas åvdep Divtasvuona suohkanin.
Æhppa l nævvon giellahárjjidallamij, ja ij sámegielaga jali fágalasj åhpadusá saje dievde.
Gæhttjal «Julevsámegiela varresvuodaparlerra» https://lulesamisk-helseparlor.up.railway.app/ External link.
Álkke adnet mobijllan
Goappátjijt ehpajt máhtá rahpat næhttabiele baktu. Máhtá aj dajt biedjat mobijla «Sijddasjærmmaj» váj la álkke dajt vas gávnnat. Julevsáme jiedna l dagádum Divvunis, ja aneduvvá viehkken hárjjidallamin.
Ehpa sválldasijt ja bagádallamav gåktu dajt mobijla «Sijddasjærmmaj» biedjat gávna suohkana bielen «Giellaresursa» https://www.hamaroy.kommune.no/snarveier/samisk-sprak-rettigheter-og-forvaltning/kompetanse-kurs-og-utdanning-i-lulesamisk/giellaresursa---lulesamiske-sprakressurser External link..
Ávkkit Giellavahkov gæhttjalibmáj. Álge buorástahttemijn!
Sist oppdatert


