Buorisboahtem almodibmáj: samehets.no
Aktisattjat Politidjadirektoráhtajn, gåhttju Sámedigge almodibmáj næhttabieles samehets.no – bagádus gåktu sámebijtástimev diededit ja guoddalit. Sámebijtástibme le unugis ja hárddem. Ulmutja máhtti aj stráffaj sivádahttet dassta. Valla majt dahkat jus sámebijtástimev váseda? Muhttijn le gássjelis diehtet makkir riektá ja máhttelisvuoda gávnnuji. Sámedigge sihtá dáv rievddat. Aktisattjat Politidjadirektoráhtajn, lip dahkam bagádusáv samehets.no. Dánna oattjo bagádusájt majt dahkat duon dán dilen jus sámebijtástimev váseda. Oattjo aj diedov sámebijtástime birra, guoskavasj lágajs ja gåvvå dajs dievnastusájs ma bagádi ja diedojt vaddi.