 |
| Foto: Kjell Fredriksen |
Hábmera suohkan
Hábmera suohkan la Nordlánda fylkan ja gullu Salten guovlluj rájáj Ufuohttaj, Lufoahttaj ja Viestarállaj. Ådåjakmáno 1. biejve rájes 2020 biejaduvvin Hábmera suohkan ja Divtasvuona allebielle aktij Hábmera suohkanin. Suohkan la ájnna suohkan julevsáme guovlon mij la sáme giellaháldadimguovlon. Julevsámegiella la bájke sáme giella.
Sámegiella ja dárogiella li dássásasj giela suohkanin. Gájka máná vuodoskåvlån bessi sámegielav oahppat. Suohkanin la aj priváhta sáme mánájåroj Ájluovtan.
Suohkanin li sulle 2700 viesáda ja dåppe li moadda bájke, degu Stuorgiedde, Ájluokta, Måsske, Badjesijdda, Trádná, Skutvijkka, Sisnuorre ja Ulsváhke ja divna dá bájke li sierralágátja ietjas láhkáj tjáppa luondoj: merragádde, nuorre ja váre.
Suohkanin la valjes ja moattebelak æládusiellem. Suohkanin la edna mineraldåjma, el-fábmo ja guollebiebbmamæládus. Duodden li suohkanin edna smávep ja stuoráp vidnudagá. Suohkanin gávnnu Knut Hamsun joarkkaskåvllå, ja suohkan li nasjonála dásen dåbdos gå miján li kulturásadusá Hamsunguovdásj ja Árran - julevsáme guovdásj ja doarroájgen 1940-45 lij edna rádjálåvssim Svieriga bælláj.
 |
| Foto: Svetlana Gracheva |
Virge birra
Mijá suohkanin dættodip buorre ja avtaárvvusasj dievnastusájt gájka viesádijda, nanos bájkálasj demokratijjav ja ålles ja aktidum sebrudakåvddånimev. Giellaháldadime suohkanin dættodip nannit ja åvddånahttet julevsáme gielav, kultuvrav ja sebrudakiellemav. Mijá moattebelak æládusiellem gájbbet vuogas ja innovatijva aktisasjbargov suohkana ja æládusiellema gaskan.
La gus dån dakkir jådediddje gut vuojná man ájnas la:
- háldadus ja politihkkára aktan barggi
- vuojnnet ållesvuodav suohkanin gånnå la moattegielakvuohta ja moadda kultuvra
- buorre struktuvraj ja buorre prosessajt jåhtuj biedjat ja tjadádit
- tjielggasit guládallat ja barggat sihke ietjas organisasjåvnån, politihkkárij ja álmmugijn, aktan vuogas aktisasjbarggo suohkana gájka åsij ja guovlo ja guovdásj oajválattjaj ja etáhtaj vuoksjuj
- jådedit sebradahtte láhkáj
- vuorodit åvddånimev, tjoavddusijt ja ådå ájádusájt måvtugis láhkáj
de la dån dakkir jådediddje gev sihtap prosæssaj gåhttjot fáron.
Dujna galggá dákkir åhpadus:
Buoremus jus dujna la guoskavasj masteroahppo háldadusoajvve virggáj. Mastergráda gájbbádusás máhtá bessat 3-jahkásasj alep åhpadusájn jus dujna li guoskavasj vásádusá almulasj suorges.
Duodden dættodip:
- Jut buoragit dádjada dahkamusáj sisanov ja kvalitiehtav
- Vijdes hárjjánibme jådediddjen
- Edna máhtto suohkana/almulasj háldadusá suorges
- Digitála máhtudahka
- Máhtto ja vásádusá priváhta æládusájs
- Persåvnålasj vuogasvuohta ja mihttidahtte båhtusa åvdep bargojs
Máhtudagá sáme gielan, kultuvran ja sebrudakiellemin dættoduvvi duoddetjehpudahkan gå kandidáhta ietján li sæmmi dásen.
Mij fállap:
- Geldulasj ja hásstaliddje dahkamusájt råhtos ja hávsskes barggobirrasin
- Virgev mij gájbbet ådåsit ájádallat suohkanin mij la åvddånime
- Suohkan máhttá viehkedit årudagájn
Bálkká sjiehtadusá milta. Jåhtemgålo mávseduvvi doajmme njuolgadusáj milta.
Jus sidá ienebut diehtet virge birra maná diehki: hamaroy.kommune.no jali bedriftskompetanse.no. Máhtá aj válldet aktijvuodav suohkanåjvijn Britt Kristoffersen 908 91 354, jali Eivind Hellevik, Bedriftskompetanse AS 906 14 830. Jus dujna li gatjálvisá de besa guládallat Bedriftskompetanse AS:ajn navti váj ep duv namáv almoda.
Hábmera suohkan sihtá almodit nav ålov gå vejulasj. Almulasjvuodalága §25 milta máhtti diedo åhttse birra almoduvvat vájku åhttse sihtá suv namma ij galga åvddån boahtet.
Jus sidá sáddit åhtsåmusáv aktan CV:ajn maná bedriftskompetanse.no næhttabælláj åvddål 20.03.2021