Mij la duostudiddje sijddaguossidibme?
Duostudiddje sijddaguossidibme le fálaldahka rádij ja bagádallamij birra ma vatteduvvá sjabes vuorrasijda gudi sijdajn årru ja e oattjo ietjá dievnastusá gå jasskavuodaalármma ja viehkkenævo.
Ulmme guossidimijn le ságastalátjit varresvuoda ja árgabiejve birra. Dån oattjo diedojt fálaldagáj ja dåjmaj birra ma li suohkanin, ma máhtti dunji liehket guovddelis.
Duostudiddje sijddaguossidibme åvdeda varresvuodav ja buktemav, ja máhttá viehkedasstet váj aktijvalattjat ja iesjrádálattjat vieso, aj gå hælsso nievreduvvá. Fálaldahka galggá aj måvtåstuhttet ja arvusmahttet ietjat árggabiejvev buktet viessot, ietjat årudagán.
Gudi guossáj båhti?
Duostudiddje juogos (DJ) le fágajgasskasasj juogos, moadda fáhkaulmutjijs. Valla dåssju guovtes boahteba guossáj, Laila Vatn ja Katarina Eidissen. Såj sjiehtadibá dujna guossedime birra, ja jus la sávadahtte máhtti Varresvuoda guládalle ja/jali ietjá lagámusá siegen liehket.
«Bæjvválattjat bargav varresvuoda -ja huksodievnastusá juollodimijn, Juollodimkontåvrå baktu, ja guossidip moaddásijt jagev tjadá. Åtsådallamijt majt oadtjop guossidimijs sidáv galggá dunji ávkken boahtet» javlla Katarina Eidissen, ássjegiehtadalle Juollodimkontåvrån. Ja duoddáj javlla «Sávvadahtte le dån sidá mijáv guossáj, ja ergoterapievtta Laila Vatn ja mån ávvudallin duvvá iejvvit».
Mij la dát?
Duostudiddje juogos adnuj válldá nasjonálla ságastallambagádallamav gå guossidime tjadáduvvá. Bagádallam le vædtsak mij aneduvvá váj tjalmostip dav mij la ájnas dunji. Tiemá máhttá liehket iesjdåbddo, biebbmo, varresvuohta, oassálasstem, viehkkenævo, sihkkarvuohta sijdan, jvn.
Diededip fálaldagáj ja dåjmaj birra ma li suohkanin, Lasjástagá ja ietjá luojvojdåjmadagáj birra.
Válde aktijvuodav mijájn ja diededa berustimev!
E-poassta: FT@hamaroy.kommune.no
Telefåvnnå: 941 32 515 (dievnastus)
Duostudiddje juogos válldá aktijvuodav dujna telefåvnå baktu sjiehtadalátjit biejvev ja ájgev goassa guossidimev tjadádit.
Fálaldahka le nåvkå.
