Skuhtjen lij oahppe Hábmera montessoriskåvlån båddim boahttsuv ietjas bidusij. Badjesijda skåvlå oahppe lij dahkam suovasbiergojt, gáhkojt ja bidusav. Sij lij duodjuham ja julevsámegielav oahppam. Ájluovta skåvllå la dábálattjat ávvudallam ålggodåjmaj, dålåj ja biebmoj. Da ietjá mánájgárdijn ja skåvlåjn lij aj barggam duon dán tiemájn.
Girjjevuorkká tjalmos sámegielav ja sáme girjálasjvuodav, ja oajvvadi girjijt ietjas vuosádusájn ja sosiála mediajn. Suohkana huksoguovdátja galggi aj miehttit slávgáj, kultuvralasj åsij ja árbbedábálasj biebmoj ja gáhkoj. Sáme kultuvrra ja ilmoduvvam ja árvvon aneduvvam Hábmera miehtáj.
Lávvodagá guovvamánno 6. biejve galggap ávvudallat sámij álmmukbiejvev. Dán jage ávvudallamij sjaddá digitálalasj buvtadibme majna ålos lij mælggadav barggam. Musihka, subttsasij ja ságájdahttemij baktu oassálassti sihke máná ja ållessjattuga. Videosáddagav suohkanij næhttabielijn besa gæhttjat kl. 10.00. Mån ávvudaláv gehtjatjit ja galla jáhkáv sjaddá árvvogis ja buorre ietjálágásj ávvudallam Sámij álmmukbiejves Hábmera suohkanin ja Árranin.
Lulujma diedon ietjáláhkáj sávvat. Sámij álmmukbiejvve la ájnas biejvve ilmodittjat ja åvddånbuktet mihásvuodav sáme giela, kultuvra ja identitehta hárráj. Dat la ávvudallambiejvve ja mij má oajvemusát sihtap æjvvalit ja aktan ávvudallat. Riek hávsske lij dijmmá gå ávvudalájma, edna dáhpádusáj skåvlåjn ja tjáppes ávvudallama Árranin iehkedisbiejve vuosstij, sihke hålaj ja kultuvra åsij.
Maŋemus jagev la Covid-19-dávdda ráddjim sihke bæjválattjat ja ávvudallamij gáktuj. Nasjåvnålasj njuolgadusá ja bájkálasj njoammum la gártjedam gåktu mij lulujma sihtat viessot. Låssånisj gå de mælggadav vihpá, ja sierraláhkáj gå li ájnas biejve ma e sjatta gåktu lijma sihtam. Ålos soajttá åhtsåli ja aktuvuodav dåbddi, dan diehti gå ep dasti nav ålov æjvvala gå åvddåla.
Muv mielas la ájnas gávnnat massta ávvusa. Árvvon adnet dav majt vilá bessap dahkat, ja sávvát buorisboahtem ådå tjoavddusijt, gå gájkka ij la dasti dagu åvddåla. Digitálla ávvudallama guovvamáno 6. biejves la dákkir tjoavdos. Doajvov ulmutja ávvusi ja dahká nav váj huoman gullu váj aktan máhttep ávvudallat.
Doajvov ulmutja biejve birán muossádi. Dahkit njálga biebmojt, tsåggit gápptáj ja ávvudalá duv lahkasabmusij. Ájggegávdan gånnå ep máhte vuojga guossidallat, de la aj vuogas ålggon liehket. Sjiejssit jali váttsatjit máhttep aktan dahkat, gaskaj nubbe nuppes. Lahkavuohta luonnduj buorev dahká.
Såjtij æjvvalip sáme slávgán soames váren lávvodagá?
Nuorttan Juoksanástij vuolen
dáppen ráfes Sámeednam.
Duottarduogen duottar vuojnnu,
jávre sledju lahkalakkoj.
Tjåhkå allen, båre tjæron
allánaddi alme vuosstij.
Jågå skåvvi, vuome sjåvvi
tsáhki tsækko stállenjárga
máradiddje merajda.
Langt mot nord under Karlsvognen
sakte stiger Samelandet:
Vidde seg bak vidde strekker,
sjø ved sjø hvor øyet rekker.
Lier, åser, snaue rabber
hever seg mot himmelbrynet.
Elver bruser, skoger suser,
stålgrå, steile fjell-nes skyter
mot det ville hav seg ut.
Fra Sámi soga lávlla av Isak Saba
Mån sávav gájkajda vájmulasj vuorbbe biejvijn, luluj dievdeduvvat mihávuodajn ja ávvujn.
Britt Kristoffersen, suohkanoajvve.
Oversetting: Adrian Mikkelsen, Giella AS